Fushata e mediave sociale për të kundërshtuar teoritë konspirative shtrihet edhe në Evropën Juglindore dhe në Turqi

UNESCO ka lançuar një sërë materialesh infografike në të gjitha gjuhët e Evropës Juglindore dhe Turqisë për të adresuar përhapjen në internet të teorive konspirative të lidhura me COVID-19 përmes të menduarit kritik dhe empatisë.

Pandemia COVID-19 ka shpërthyer një pandemi paralele të dezinformacionit dhe thashethemeve të rrezikshëm në formën e teorive konspirative, që përfshijnë shpjegime të pamundura për origjinën e virusit, si mund të shërohet dhe kush duhet fajësuar për përhapjen e tij. Teoritë konspirative minojnë shkencën, faktet dhe besimin në institucione dhe paraqesin një kërcënim të menjëhershëm për individët dhe komunitetet.

Si pjesë e Projektit të UNESCO-s të financuar nga BE “Krijimi i Besimit në Media në Evropën Juglindore dhe Turqi, Faza II”, UNESCO po shtrin fushatën e suksesshme të mediave sociale #ThinkBeforeSharing, e organizuar fillimisht me Bashkimin Evropian dhe Twitter, në zonën e zgjerimit të BE. Věra Jourová, Nënkryetare e Komisionit Evropian për Vlerat dhe Transparencën, mori pjesë në mënyrë aktive në fushatë, duke ndarë këto materiale për të ndihmuar qytetarët me mjete të dobishme për të njohur dhe hedhur poshtë teoritë konspirative.

Burimet mësimore vizuale trajtojnë se si të njohim teoritë konspirative, të kuptojmë se çfarë i shtyn ato, t’i hedhim poshtë ato me fakte dhe t’u përgjigjemi në mënyrë efektive atyre që po i përhapin ato. Burimet mësimore vizuale janë pjesë e punës së UNESCO-s për Edukimin për Median dhe Informacionin (EMI) dhe grafika edukative të prodhuara si pjesë e përgjigjes së Organizatës ndaj COVID-19. Ato bazohen në këshillat eksperte të Profesor Michael Butter, autor i Guidës për Teoritë Konspirative, si dhe Stephan Lewandowsky dhe John Cook, autorë të Manualit të Teorive Konspirative.

Projekti “Krijimi i Besimit në Media në Evropën Juglindore dhe Turqi, Faza II” synon të forcojë lirinë e shprehjes duke fuqizuar qytetarët të mendojnë në mënyrë kritike në një rajon që konsiderohet vulnerabël ndaj përhapjes së dezinformacionit. Së bashku me partnerët kryesorë dhe me financim nga Bashkimi Evropian, projekti adreson tre objektiva kryesore, njëri prej të cilëve është rritja e të menduarit kritik tek të rinjtë, përmes Edukimit për Median dhe Informacionin në arsimin formal dhe jo-formal. Fushata aktuale e mbështet këtë objektiv duke rritur aftësitë EMI dhe, kështu, duke rritur kërkesën dhe mbështetjen publike në rajon për përmbajtje cilësore të medias.

Shkarkoni gjithë grafikat (ZIP file) në: Shqip – BHS – Maqedonisht– Turqisht