Siguria online e fëmijëve dhe edukimi mediatik zgjasin për gjithë jetën

Nga Linda Pino

Fëmijët dhe adoleshentët sot gjithnjë e më tepër janë duke përdorur internetin për të marrë informacion, argëtuar, komunikuar me shokë etj. Shqipëria është një vend që ka përqafuar teknologjinë prej vitesh. Pandemia e krijuar nga COVID-19, solli një tablo ndryshe nga vitet e tjera. 9 Mars 2020 shënoi ditën kur mbi 500 mijë fëmijë dhe adoleshentë në vend u “detyruan” të përdornin teknologjinë digjitale dhe internetin si mjetin e vetëm për të komunikuar, mësuar në distancë, argëtuar dhe për të marrë informacion. Sipas INSTAT, rreth 82.2 % e popullsisë në Shqipëri kanë akses të plotë në internet, gjë kjo që e kthen përdorimin e internetit dhe mbrojtjen prej tij në një prej situatave më të pakontrolluara dhe më të rrezikshme në vend.

Edhe pse Shqipëria ka ratifikuar një sërë marrëveshjesh dhe konventash ndërkombëtare që sigurojnë të drejtat e fëmijëve dhe mbrojnë interesin më të lartë të tyre, vendi ynë ende mangësi në drejtim të mekanizmave të mbrojtjes së fëmijëve gjatë lundrimit të tyre online, trajnimit të ligj-zbatuesve për metodat më të fundit të denoncimit dhe sigurisë online të fëmijëve dhe informimit të vazhdueshëm të shoqërisë për ta bërë internetin sa më të sigurt për fëmijët.

Ndërsa në vitet e fundit është vënë re një rritje e përdorimit të internetit në vend, përmirësimi i legjislacionit për të mbrojtur fëmijët online nuk ka ecur me të njëjtin ritëm. Mbrojtja kryesore që i ofrohet sot fëmijëve vjen nëpërmjet normave të Kodit Penal, ndonëse edhe ato janë të pjesshme dhe nuk ofrojnë një mbrojtje të qartë dhe të plotë të fëmijëve në internet.

Ky shkrim rreth sigurisë online të fëmijëve dhe edukimit mediatik i drejtohet prindërve dhe fëmijëve duke i pajisur me informacione që i ndihmojnë ata të përdorin me zgjuarsi dhe në mënyrë të shëndetshme internetin.